Հենրիկ Բախչինյան Գրքեր Սայաթ Նովայի կյանքը Բոդլեր Henrik Bakhchinyan Baxchinyan

1․ Հ. Բախչինյան, Սայաթ-Նովայի կյանքը, Երևան, 2021
Գիրքը բովանդակում է Սայաթ-Նովայի կյանքի և գործունեության հանգամանալի քննությունը, որն ամենից համապարփակն է եղած բոլոր կենսագրականների մեջ: Խարսխված է երգչի եռալեզու ողջ ժառանգության, բանասիրությանը հայտնի բոլոր տվյալների և սայաթնովագիտության բազմամյա փորձի ու ձեռքբերումների վրա: Ունի Հավելված, որտեղ ներկայացված է սայաթնովյան ծածկագրերի վերծանությունը:
250 էջ, հաստ կազմով՝ 1500 դրամ, բարակ կազմով՝ 1000 դրամ:

2․ Հ. Բախչինյան, Սայաթնովագիտական հարցեր, Երևան, 2023
Գրքում հանգամանալի քննության են ենթարկված Սայաթ-Նովայի եռալեզու ժառանգությանը, ստեղծագործական անհատականությանը, գրապատմական դերին և բանաստեղծական-աշուղական արվեստին վերաբերող բնագրագիտական, տիպաբանական և բանարվեստային հարցեր: Առանձնակի ներկայացված է սայաթնովագիտության ընթացքը և գնահատված է երախտավոր սայաթնովագետների վաստակը:
335 էջ, հաստ կազմ, 1500 դրամ:

3․ Հ. Բախչինյան, Սայաթ-Նովայի բանաստեղծական ժառանգությունը. Բնագրեր և քննություն, Երևան, 2016
Աշխատության մեջ սայաթնովագիտության հարուստ փորձի հիման վրա քննված է խոշորագույն աշուղ-բանաստեղծի ողջ ժառանգությունը:
Ներկայացված են հայերեն խաղերի ճշգրտված բնագրերը՝ արևելահայերեն աշխարհաբար արձակ վերածումներով, հանգամանալի ծանոթագրություններով ու մեկնություններով: Թուրքերեն և վրացերեն խաղերը ներկայացված են հայատառ բնագրերով, տրված են դրանց հայերեն բառացի թարգմանությունները՝ համապատասխան ծանոթագրություններով ու մեկնություններով:
Առանձնակի կատարված են հեղինակային պատկանելության իմաստով երկբայելի և մերժելի հայերեն և թուրքերեն խաղերի տեսությունները: 524 էջ, մեծադիր, հաստ կազմ, սուպեր շապիկ. 3000 դրամ:

4․ Հ. Բախչինյան, Հայ միջնադարյան բանաստեղծությունը. Հատոր Ա-Ե
Հ. Բախչինյան, Հայ միջնադարյան բանաստեղծությունը. Հատոր Ա. Ոսկեդարից Նարեկացի, Երևան, 2021, 390 էջ
Հատորում քննվում է 5-10-րդ դարերի հայ բանաստեղծության գրապատմական ուղին՝ երեք փուլերով. Ոսկեդար, 7-8-րդ դարեր, 10-րդ դար: Առաջին փուլն ընդգրկող բաժնի ներածականում քննված է հայ անհատական բանաստեղծության սկզբնավորումը, որպես օրհներգություն, ապա ստեղծագործությունների գաղափարական և գեղարվեստական վերլուծությամբ ներկայացված են ոսկեդարյան օրհներգուները (Մեսրոպ Մաշտոց, Սահակ Պարթև, Գյուտ Արահեզացի, Մովսես Խորենացի, Հովհան Մանդակունի, Ստեփանոս Սյունեցի Ասողնիկ) : Երկրորդ փուլն ընդգրկող բաժնում առկա է ժամանակի պատմամշակութային հարցերին նվիրված ներածական և ներկայացված են այդ շրջանի բանաստեղծության խոշոր ներկայացուցիչները (Կոմիտաս Աղցեցի, Դավթակ Քերթող, Սահակ Ձորոփորեցի, Հովհան Օձնեցի) ՝ առանձնակի և երկրորդական կարգի հեղինակները՝ միասնաբար: Երրորդ փուլն ամբողջությամբ վերաբերում է միջնադարյան հայ քերթության հանճարի՝ Գրիգոր Նարեկացու ստեղծագործության քննությանը: Հատորն ունի նաև մասնակի թեմաներ արծարծող երկու հավելված:

Հատոր Բ. Մինչև Շնորհալի և հետո... 11-12-րդ դարեր, Երևան, 2022, 303 էջ
Հատորում քննության է ենթարկված 11-12-րդ դարերի հայ բանաստեղծության գրապատմական ուղին: Ունի պատմա-մշակութային հարցեր լուսաբանող ներածություն: Երկերի գաղափարական և գեղարվեստական վերլուծությամբ առանձնակի երկայացված են ժամանակի բանաստեղծության խոշոր ներկայացուցիչները (Պետրոս Գետադարձ, Գրիգոր Մագիստրոս, Հովհաննես Սարկավագ, Ներսես Շնորհալի, Գրիգոր Տղա), իսկ համեմատաբար երկրորդական կարգի հեղինակների ժառանգությունը քննված է «Այլ բանաստեղծներ» ընդհանուր խորագրի ներքո:

Հատոր Գ. Երզնկացիներ, Ֆրիկ, Թլկուրանցի. 13-14-րդ դդ. Երևան, 2022, 356 էջ
Հատորում քննության է ենթարկված 13-14-րդ դարերի հայ բանաստեղծության գրապատմական ուղին: Ունի պատմա-մշակութային հարցեր լուսաբանող ներածություն: Երկերի գաղափարական և գեղարվեստական վերլուծությամբ առանձնակի ներկայացված են ժամանակի բանաստեղծության խոշոր ներկայացուցիչները (Հովհաննես Պլուզ երզնկացի, Ֆրիկ, Կոստանդին Երզնկացի, Հովհաննես Թլկուրանցի), իսկ համեմատաբար երկրորդական կարգի հեղինակների ժառանգությունը քննված է «Այլ բանաստեղծներ» ընդհանուր խորագրի ներքո: Հատորն ունի հավելված, որտեղ նարկայացված են ժամանակի խոշոր չորս բանաստեղծների կենսագրական ակնարկները:

Հատոր Դ. Մինչև Աղթամարցի և հետո. 15-16-րդ դդ. Երևան, 2022, 332 էջ
Հատորում քննության է ենթարկված 15-16-րդ դարերի հայ բանաստեղծության գրապատմական ուղին: Ունի պատմա-մշակութային հարցեր լուսաբանող ներածություն: Երկերի գաղափարական և գեղարվեստական վերլուծությամբ առանձնակի ներկայացված են ժամանակի բանաստեղծության խոշոր ներկայացուցիչները (Առաքել Սյունեցի, Առաքել Բաղիշեցի, Մկրտիչ Նաղաշ, Գրիգորիս Աղթամարցի, Հովասափ Սեբաստացի), իսկ համեմատաբար երկրորդական կարգի հեղինակների ժառանգությունը քննված է «Այլ բանաստեղծներ» ընդհանուր խորագրի ներքո:
Հատորն ունի հավելվածներ, որոնց մեջ տրված են որոշ բանաստեղծների կենսագրական ակնարկներ, քննված են Գրիգորիս Աղթամարցուն վերագրված տաղերը, ինչպես նաև հայ աշուղության սկզբնավորումը:

Հատոր Ե. Մինչև Սայաթ-Նովա. 17-18-րդ դդ. Երևան, 2022, 312 էջ
Հատորում քննության է ենթարկված 17-18-րդ դարերի հայ բանաստեղծության գրապատմական ուղին: Ունի պատմա-մշակութային հարցեր լուսաբանող ներածություն: Երկերի գաղափարական և գեղարվեստական վերլուծությամբ առանձնակի ներկայացված են ժամանակի բանաստեղծության խոշոր ներկայացուցիչները՝ Մարտիրոս Ղրիմեցի, Երեմիա Չելեպի Քյոմյուրճյան, Նաղաշ Հովնաթան, Պաղտասար Դպիր, Պետրոս Ղափանցի, Սայաթ-Նովա: Համեմատաբար երկրորդական կարգի հեղինակների ժառանգությունը քննված է «Այլ բանաստեղծներ» ընդհանուր խորագրի ներքո: Հատորն ունի երկու հավելված. Առաջինը վերաբերում է ժամանակի աշուղներին, երկրորդը՝ Խաչատուր Էրզրումեցու բանաստեղծության տեսությանը:
Հաստ կազմ, հինգ հատորը միասին 5000 դրամ:

5․ Հ. Բախչինեան, Յովհաննէս եւ Կոստանդին Երզնկացիներ, Բնագրեր եւ քննութիւն, Երևան, 2023, 492 էջ:
Գիրքը բովանդակում է 13-րդ դարի խոշոր քնարերգուներ Յովհաննէս եւ Կոստանդին Երզնկացիների բանաստեղծական ժառանգութիւնն ու դրանց բանասիրական-գրականագիտական քննութիւնը: Ներկայացուած են հեղինակների բանաստեղծական բոլոր գործերի ճշգրտուած բնագրերը, արձակ աշխարհաբար վերածումներն ու ծանօթագրութիւն-մեկնութիւնները: Քննուած են բանաստեղծների կեանքն ու գործը եւ նրանց քերթութեան գաղափարական-գեղարուեստական արժանիքները, որոշարկուած են նրանց տեղն ու դերը հայ միջնադարեան բանաստեղծութեան պատմութեան մէջ:
Հաստ կազմ, 2000 դրամ:

6․ Հ. Բախչինյան, Ֆրիկի բանաստեղծական ժառանգությունը. Բնագրեր և քննություն. 444 էջ, Երևան, 2021։
Գիրքը բովանդակում է 13-րդ դարի մեծ բանաստեղծ Ֆրիկի ժառանգությունն ու նրա բանասիրական-գրականագիտական քննությունը: Ներկայացված են բանաստեղծի հեղինակած բոլոր բանքերի և հայրենների հնարավորինս ճշտված բնագրերը, դրանց արձակ աշխարհաբար վերածումները, ծանոթագրություններն ու մեկնությունները: Քննված են Ֆրիկի կյանքը և նրա ստեղծագործության գաղափարական բովանդակությունն ու գեղարվեստական արժանիքները: Հաստ կազմ, 2000 դրամ:

7․ ՇԱՌԼ ԲՈԴԼԵՐ, Արձակ էջեր, Թարգմանությամբ Հենրիկ Բախչինյանի, Արուսյակ Բախչինյան-Գրինոյի Երևան, 2023, 225 էջ
Գիրքը բովանդակում է ֆրանսիացի բանաստեղծ Շառլ Բոդլերի «Փարիզի Սփլինը» փոքրիկ արձակ պոեմների և «Հաշիշի պոեմը» էսսեի հայերեն թարգմանությունները: Հատորյակն ունի նախաբան և ծանոթագրություններ: Բարակ կազմ, 1000 դրամ: